चक्रवातको जोखिम बढेपछि झापा प्रशासनद्वारा तीन दिन सतर्क रहन आग्रह

काठमाडौं – बङ्गालको खाडीमा उत्पन्न ‘अर्नव’ चक्रवातको प्रभावले झापासहित कोशी प्रदेशमा बाढी र डुबानको जोखिम बढेपछि जिल्ला प्रशासन कार्यालय झापाले सर्वसाधारणलाई तीन दिन सतर्कता अपनाउन आग्रह गरेको छ ।

जल तथा मौसम विज्ञान विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणबाट प्राप्त सूचनाका आधारमा प्रशासनले कात्तिक १२ देखि १४ गतेसम्म कोशी प्रदेशमा चट्याङ र हावाहुरीसहित मध्यमदेखि भारी वर्षा हुनसक्ने जनाएको छ । प्रतिकूल मौसमका कारण जनजीवन प्रभावित हुनसक्ने भन्दै प्रशासनले सम्भावित जोखिमबाट जोगिन आवश्यक सावधानी अपनाउन अनुरोध गरेको हो ।