मधुमासमा मेहन्दीको रौनक

साउन महिनाको शुरुवातमै प्रायः महिलाको दिमागमा हरियो, रातो र पहेँलो तीन रंग आउँछ । उनीहरुले साउन महिनामा गरिने आफ्नो शृङ्गारमा यही रंगका कपडा, चुरा, पोते बढी प्रयोग गर्ने गरेको पाइन्छ । विशेष गरी साउनको सोमबार महिलाहरु ऊभन्दा म के कम भन्दै सजिएका देखिन्छन् । यो क्रम प्रायः भदौमा पर्ने हिन्दू नारीहरुको महान् चाड तीजसम्म नै जारी रहन्छ ।

सूर्य दक्षिणायण लागेपछि अर्थात् साउन १ गतेदेखि विशेष चार्डपर्वको शुरुवात हुने गर्छ । पूर्वीय संस्कृति अनुसार साउनको सोमबारलाई झनै विशेषरुपमा महिलाहरुले लिने गरेको पाइन्छ । साउनको हरेक सोमबार भगवान् शिवको पूजा–अर्चना गर्दा मनोकांक्षा पूरा हुने विश्वास र आस्थाका साथ महिलाहरु हरियो वा रातो पहिरनमा सजिएर व्रत बस्ने गर्छन् । साथै विवाहित महिला मात्र नभएर अविवाहित किशोरीहरुले समेत यस महिनामा मेहन्दी लगाएर सजिने गरेको देखिन्छ ।