कार्यान्वयन नहुने योजनाहरू

भन्न त गतिलो योजना बन्नु नै आधा काम हुनु हो भनिन्छ। नेपालका हकमा भने यस्तो भनाइ सत्य सावित नहुन सक्छ। के भनिन्छ भने नेपालमा योजना अगतिलो बनेका होइनन्, कार्यान्वयन चाहिँ समस्या हो। हुन पनि १५ औं पञ्चवर्षीय योजनासम्म आइसक्दा पनि नेपालमा उपलब्धि हासिल हुन सकेको छैन।

२०१३ सालदेखि अहिलेसम्मका कुनै पनि योजनाले लक्ष्य भेटेनन्। अहिलेको १५औं योजनाको समय आधा सकिएको छ। योजना कार्यान्वयनको पहिलो आर्थिक वर्ष ८.५ प्रतिशतको आर्थिक वृद्धि र पाँच वर्षमा औसत ९.६ प्रतिशत हासिल गर्ने लक्ष्य थियो। तीन वर्षको औसत आर्थिक वृद्धिदर भने २.२ प्रतिशतमात्र छ। राष्ट्रिय गौरवका आयोजनाहरू यो योजनाका प्राथमिकतामा थिए, ती त राष्ट्रिय लज्जाका योजनामा सीमित छन्। भएको एउटा प्रगति भनेको प्रतिव्यक्ति आम्दानीमा सुधार हो। तर मुख्य लक्ष्य गरिबी निवारणमा खास उपलब्धि हासिल छैन।