बुटवलमा चोरीमा संलग्न ८ जना पक्राउ, सुनचाँदीका गरगहनासहित सामग्री बरामद

काठमाडौँ । रुपन्देहीको बुटवल उपमहानगरपालिकाका दुई छुट्टाछुट्टै स्थानमा भएका चोरी र चोरी प्रयासका घटनामा संलग्न रहेको आरोपमा प्रहरीले आठ जनालाई पक्राउ गरेको छ ।

पक्राउ पर्नेमा सात जना भारतीय नागरिक र एक जना नेपाली नागरिक रहेका छन् ।

रुपन्देही प्रहरी प्रमुख प्रहरी उपरीक्षक जनकबहादुर शाहीकाअनुसार गत जेठ १९ गते राति अन्दाजी २ः३० बजे गस्तीमा रहेको प्रहरी टोलीले बुटवल उपमहानगरपालिका वडा नं. ५, विकासपथस्थित ‘देव सुनचाँदी पसल’को सटरको ताला काट्दै गरेको अवस्थामा सात जनालाई रङ्गेहात पक्राउ गरेको हो ।

पक्राउ पर्नेहरूमा भारतको उत्तर प्रदेश, सन्तकविरनगर जिल्लाका २६ वर्षीय आकाश वर्मा, २७ वर्षीय अब्दुल सलमा, १९ वर्षीय नसिर अली, २३ वर्षीय मोहम्मद सुलेमान, २८ वर्षीय शहिद मोहम्मद सेख, २१ वर्षीय कर्ण शर्मा र २३ वर्षीय मोहम्मद पारिस रहेका छन् । उनीहरूको साथबाट ताला काट्न प्रयोग गरिने कैँची र पेचकस समेत बरामद गरिएको छ ।

उनले भने ‘भाडामा लिई तिनहौ सुनचाँदी पसल सञ्चालन गर्दै आएका जिल्ला रुपन्देही, बुटवल उपमहानगरपालिका वडा नम्बर ३ पुलचोक बस्ने वर्ष ४१ को दीपक बिक पोखरा गएको अवस्थामा अन्दाजी १ करोड ४६ लाख ९४ हजार ७ सय बराबरको सुनचाँदीका गरगहनाहरू चोरी भएको भनेर प्रहरीलाई जानकारी आउँछ । तत्पश्चात् प्रहरीहरूले, प्रहरीले त्यसमा अनुसन्धान गर्दाखेरि यो घटनामा सोही सुनचाँदी पसलका सञ्चालक दीपक बिक र सोही पसलमा काम गर्ने कर्मचारी नवीन बिकको संलग्नता भएको अहिलेसम्मको अनुसन्धानबाट देखिएको छ। आफ्नै र आफ्नो सहयोगी कर्मचारीबाट चोरी गराउनुपर्ने मुख्य उद्देश्य विमालाई दाबी गर्नु र त्यो सुनचाँदी पसलमा विभिन्न व्यक्तिहरूले आफ्नो धितोमा, धितोमा पनि मान्छेहरूले राखेर सुन राखेर लोन लिएको हुन्छ। र त्यो सुनहरूलाई पनि हिनामिना गर्ने उद्देश्य नै रहेको देखिन्छ र यो दुवै जना दीपक बिक र नवीन बिकलाई हामीले विभिन्न आयामबाट अनुसन्धान गरिसके पछाडि उहाँहरू नै हो भन्ने कुरा पत्ता लागिसकेपछि यहाँहरूलाई हामीले यसको बारेमा जानकारी दिन अनुरोध गरेका हौँ। र यो घटनामा अझ यो भन्दा बढी परिमाणको सुनचाँदीहरू पनि हुन सक्छ भन्ने हाम्रो अनुमान छ । त्यो बिस्तारै फेरि खुल्दै गएको बखतमा हामी यहाँहरूलाई भन्ने छौँ ।’

त्यसैगरी, गत जेठ ४ गते बुटवल उपमहानगरपालिका वडा नं. ८, सुक्खानगरस्थित राजेश कुमार गुप्ताको घरमा कोही नभएको मौका पारी भएको चोरीको घटनामा संलग्न एक जनालाई पनि प्रहरीले पक्राउ गरेको छ । पक्राउ पर्नेमा कपिलवस्तु नगरपालिका वडा नं. २ बस्ने २७ वर्षीय शिव ओम थारु रहेका छन् । प्रहरीले निज थारुको साथबाट चोरी भएका सुनका दुई थान बाला, लकेटसहितको एउटा सिक्री, अर्को एउटा सिक्री, चार थान कानपासा, एक जोडी झुम्का, एक जोडी वाली, सेतो र हरियो माला दुई थान, तीन थान औँठी, एक जोडी टप र स्टोन फुली बरामद गरेको छ । यस्तै, चाँदीको लोटा एक थान, ६ थान बिच्छु र एक थान औँठी पनि बरामद भएको प्रहरीले जनाएको छ ।

पक्राउ परेका सबै अभियुक्तहरूमाथि चोरी सम्बन्धी कसुरमा अदालतबाट म्याद थप गरी आवश्यक अनुसन्धान भइरहेको प्रहरीले जानकारी दिएको छ ।