दिल्ली क्यापिटल्सको रोमाञ्चक जित, राजस्थान रोयल्स ५ विकेटले पराजित

काठमाडौँ । इन्डियन प्रिमियर लिग अन्तर्गत आइतबार भएको खेलमा दिल्ली क्यापिटल्सले राजस्थान रोयल्सलाई ५ विकेटले पराजित गरेको छ । नयाँ दिल्लीस्थित अरुण जेट्ली स्टेडियममा भएको यो खेलमा दिल्लीले १९४ रनको लक्ष्य ४ बल बाँकी छँदै सफलतापूर्वक पछ्यायो । यो जितसँगै दिल्लीले प्लेअफमा पुग्ने आफ्नो सम्भावनालाई जीवितै राखेको छ ।

टस हारेर पहिले ब्याटिङको निम्तो पाएको राजस्थान रोयल्सले निर्धारित २० ओभरमा ८ विकेट गुमाएर १९३ रनको बलियो योगफल तयार पारेको थियो। राजस्थानका लागि ध्रुव जुरेलले ४० बलमा ५३ रन तथा रियान परागले २६ बलमा ५१ रनको अर्धशतकीय पारी खेले । त्यस्तै, वैभव सूर्यवंशीले पनि २१ बलमा ४६ रनको महत्त्वपूर्ण योगदान दिए । दिल्लीका बलर मिचेल स्टार्कले उत्कृष्ट प्रदर्शन गर्दै ४ ओभरमा ४० रन खर्चेर ४ विकेट लिए भने लुंगी एनगिडी र माधव तिवारीले समान २(२ विकेट लिए ।