नवलपुरमा अठार हजार बढी प्रतिष्ठानको आर्थिक गणना सम्पन्न

राष्ट्रिय आर्थिक गणनाअन्तर्गत नवलपुरमा हालसम्म १८ हजार ८५८ आर्थिक प्रतिष्ठानको गणना सम्पन्न भएको छ । जिल्ला आर्थिक गणना कार्यालय नवलपुरका सहायक आर्थिक गणना अधिकारी रुद्र अधिकारीका अनुसार जिल्लामा ५४ दिनमा उक्त संख्यामा आर्थिक प्रतिष्ठानको गणना सम्पन्न भएको हो ।

कार्यालयले यसपाली नवलपुरमा २२ हजार १९५ प्रतिष्ठान गणना गर्ने लक्ष्य निर्धारण गरेको अधिकारीले जानकारी दिनुभयो । गणनाको प्रारम्भिक तथ्याङ्क हेर्दा जिल्लामा पछिल्ला वर्षहरूमा आर्थिक गतिविधि विस्तार हुँदैगएको र व्यावसायिक प्रतिष्ठानको संख्या उल्लेख्य रूपमा वृद्धि भएको देखाएको अधिकारी बताउनुहुन्छ ।

गणनामा प्राप्त तथ्याङ्कअनुसार कावासोती नगरपालिकामा सबैभन्दा बढी पाँच हजार ६२२ प्रतिष्ठान गणना भएका छन् । त्यसपछि गैंडाकोट नगरपालिकामा तीन हजार ९७१, देवचुली नगरपालिकामा तीन हजार ९२, मध्यविन्दु नगरपालिकामा दुई हजार ४९५, विनयी त्रिवेणी गाउँपालिकामा एक हजार ५०४, हुप्सेकोट गाउँपालिकामा एक हजार ६७८, बौदीकाली गाउँपालिकामा ६७८ र बुलिङटार गाउँपालिकामा ४४२ प्रतिष्ठानको गणना सम्पन्न भएको छ ।

गणनाको क्रममा जिल्लाका आठवटै पालिकामा रहेका उद्योग, व्यापार, सेवा, होटल, रेष्टुरेन्ट, कृषि तथा अन्य आर्थिक गतिविधिसँग सम्बन्धित प्रतिष्ठानहरूको विवरण संकलन गरिएको छ ।

आर्थिक गणनाको तथ्याङ्कले नवलपुरमा व्यावसायिक प्रतिष्ठानहरूको संख्या निरन्तर बढिरहेको देखाएको छ । विसं २०७५ मा सञ्चालन गरिएको आर्थिक गणनामा जिल्लाभर १२ हजार ७४५ प्रतिष्ठान रहेको तथ्याङ्क सार्वजनिक भएको थियो । हालको गणनामा लक्ष्य पूरा नहुँदै १८ हजार ८५८ प्रतिष्ठानको विवरण संकलन भइसकेको छ । यसले सात वर्षको अवधिमा जिल्लामा उद्योग, व्यापार तथा सेवा क्षेत्रको विस्तार भएको देखाएको छ ।

विशेषगरी पूर्व–पश्चिम राजमार्ग आसपासका शहरी तथा अर्ध–शहरी क्षेत्रमा व्यापारिक प्रतिष्ठान, होटल तथा पर्यटन व्यवसाय, निर्माण सामग्री, वित्तीय सेवा र अन्य व्यावसायिक गतिविधि बढ्दैगएका कारण प्रतिष्ठानको संख्या वृद्धि भएको देखिएको अधिकारीले बताउनुभयो । जिल्लामा बसाइँसराइ, शहरीकरण तथा पूर्वाधार विकासले समेत आर्थिक गतिविधि विस्तारमा सहयोग पुगेको उहाँले बताउनुभयो ।

राष्ट्रिय तथ्याङ्क कार्यालयले सञ्चालन गरिरहेको आर्थिक गणना मुलुकका आर्थिक प्रतिष्ठानको वास्तविक अवस्था, रोजगारीको स्थिति, व्यवसायको प्रकृति, लगानीको अवस्था तथा आर्थिक योगदानको विवरण संकलन गर्ने उद्देश्यले सञ्चालन गरिएको हो ।

यसबाट प्राप्त तथ्याङ्क सरकारका विभिन्न तहमा नीति निर्माण, योजना तर्जुमा, लगानी प्रवद्र्धन तथा आर्थिक विकासका कार्यक्रम तय गर्न महत्वपूर्ण आधार बन्ने अपेक्षा गरिएको छ ।

कार्यालयले गणनामा सहयोग गर्न तथा छुटेका प्रतिष्ठानहरूले गणनाकर्मीलाई आवश्यक विवरण उपलब्ध गराउन सम्बन्धित व्यवसायी तथा उद्योगीलाई आग्रह गरेको छ । गणनाको अन्तिम विवरण सार्वजनिक भएपछि जिल्लाको आर्थिक संरचना, व्यावसायिक प्रवृत्ति तथा रोजगारीको अवस्थाबारे थप स्पष्ट हुने सहायक आर्थिक गणना अधिकारी अधिकारीले बताउनुभयो ।