कुलेखानी नजिकैको सिमखोलाको बाढीमा बगेर स्कुटरसहित चालक बेपत्ता

२९ असार, काठमाडौं । मकवानपुरमा कुलेखानी नजिकैको सिमखोलामा आएको बाढीले स्कुटरसहित एक चालकलाई बगाएको प्रत्यक्षदर्शीले बताएका छन् । मकवानपुरको ईन्द्रसरोवर गाउँपालिका–२ स्थित सिमखोलामा सोमबार दिउँसो उक्त घटना भएको बताइएको छ ।

जिल्ला प्रहरी कार्यालय मकवानपुरका प्रमुख प्रहरी उपरीक्षक(एसपी) पुष्कर बोगटीले घटना दिउँसो साढे ३ बजेको रहेको जानकारी दिए । ‘त्यहाँ यात्रामा रहेका अन्य प्रत्यक्षदर्शीहरूले बताएअनुसार बाढीले स्कुटरसहित नै चालकलाई बगाएर बेपत्ता बनाएको छ,’ उनले भने, ‘सुरक्षा निकायको टोलीले खोजी कार्य गरिरहेको छ । अहिलेसम्म केही पत्ता लागेको छैन ।’