शङ्कास्पद पार्किङ गरिएका ५ वटा गाडी जरिवाना गरेर चालकको जिम्मा

काठमाडौँ । शङ्कास्पद रूपमा पार्किङ गरिएका सवारी साधनलाई जरिवाना गरेर ट्राफिक प्रहरीले चालकको जिम्मा लगाएको छ । सोमबार कान्तिपुर पब्लिकेशन, अनलाइन खबर, हिमालय टेलिभिजन र कांग्रेस सभापति गगन थापाको घरको गेटमा शङ्कास्पद रूपमा गाडी पार्किङ गरेर छाडिएको थियो । अनामनगरस्थित भाटभटेनी सुपर मार्केटमा पनि गाडी पार्किङ गरेर छाडिएको थियो ।

अनधिकृत रूपमा पार्किङ गरिएका गाडीलाई ट्राफिक प्रहरीले क्रेनको सहायताले उपत्यका ट्राफिक प्रहरी कार्यालयमा ल्याएर राखेको थियो । साँझ जरिवाना गरेर ५ वटै गाडीहरू सवारी धनी र चालकको जिम्मा लगाइएको उपत्यका ट्राफिक प्रहरी कार्यालयका एक जना अधिकृतले रातोपाटीलाई बताए । उनले भने, ‘चिट काटेर ५ वटा गाडी चालकलाई जिम्मा लगाइएको छ ।’