बेहुला बेहुलीको जीउज्यान पहेँलो पार्ने हल्दी बेसारको माहात्म्य

जग्गेमा त बेहुला बेहुली सुकिलामुकिला र रूपरङ्गले धपक्क बलेका देखिन्थे । तर फेसबुकमा हेर्दा त रूप र लावण्यले धपक्क हुनुभन्दा पहिले ज्यान पहेँलपुर भएको देखियो । ‘हल्दी रश्म’ नामक फोटोसेसनमा शीरदेखि पाउसम्मै बेसार दलेका रहेछन् । तर बेहुला बेहुलीको हल्दी र काटेर भुत्ल्याएपछि बेसार दलेको खसी उस्तै–उस्तै लागेपछि मलाई बेहुला बेहुलीको ज्यानमा जग्गेमा बस्नुअघि किन बेसार दल्ने रैछन् भन्ने थाहा पाउन मन लाग्यो । तपाईंलाई पनि भर्खरभर्खर बिहेको तामझाम र भोजभतेरको मेजमानी भ्याएर फेसबुकतिर बरालिँदा थाहा पाउने खसखस त लागेकै होला । केही काम नभएर या मारामार काम हुँदा पनि जाँगर नभएर फुर्सदिलो हुनुहुन्छ भने आउनुहोस् एकछिन बेसारको राज खोजौँ ।

बेसार पनि दुई खालका हुन्छन् । एउटा बेसार भनेको सार नभएको, फोस्रो, बेकामको । अर्को बेसार भनेको अदुवाका ढाँचाको बोट हुने र जमिनमुनि त्यस्तै छाँटले फल्ने पहेँलो एकखाले कन्दमूल । दाल र तरकारीमा हालिने त्यसैको धुलो, हलेदो । यही हलेदोबाट हल्दी भन्दै बिहेमा बेसार दल्ने चलन बसेको हो ।