दुख्दैन सरकारलाई कालापानीको घाउ

बेलाबखत भारतले नेपालको भूमि अतिक्रमण गर्दै आएको छ, । जब नयाँ स्थानमा सिमाना अतिक्रमण हुन्छ, केही समय यसले सडक र संसद् तताउने गर्छ । त्यसपछि अन्य कुनै मुद्दामा मुलुकको ध्यान आकर्षित हुन्छ । यस्ता विषयहरू स्वतः निस्तेज भएर जान्छन् । भारतले अतिक्रमित भूमिमा आफ्नो नियन्त्रण कायम गर्दै विधिवत आफ्नो क्षेत्रमा मिसाउने गरिआएको छ । १ हजार ८ सय ८० किमीमा फैलिएको हाम्रो नेपाल र भारतबीचको सिमानामा विभिन्न ७१ स्थानमा पटकपटक भएका अतिक्रमणबाट हामीले १ सय २६ वटा जंगे पिलर र करिब ६३ हजार हेक्टर जमिन गुमाइसकेको स्थिति छ । यसले आगामी दिनमा पनि निरन्तरता प्राप्त गर्नेमा कुनै सन्देह देखिँदैन ।

तर, दुर्भाग्य नै भन्नुपर्छ, नेपाल सरकारले आफ्नो भूमिको संरक्षण गर्नमा खासै उत्सुकता देखाइराखेको छैन । नेपालका विभिन्न ठाउँमा छिमेकी मुलुकले गर्दैगएको बलजफती व्यवहारका थुप्रै उदाहरण छन् । प्रतिनिधि उदाहरणका रूपमा परासीको सुस्ता क्षेत्रलाई लिन सकिन्छ । जहाँ लामो समयदेखि नेपाली भूमिमा बसी नेपालको नागरिकता प्राप्त गरी जग्गाधनी प्रमाण पुर्जा लिएका नेपाली नागरिकहरू रातारात विदेशी बनेका छन् । लालपुर्जा तिरोभरण नेपालमा, जग्गा र बस्ती भारतको भएको छ । मुलुकको सिमाना यसरी मिचिँदै जाँदा किन सरकारले चासो दिइराखेको छैन ? यसमा सन्देहका साथ विभिन्न कालखण्डका सरकारको चौतर्फी आलोचनासमेत भएको स्थिति छ ।