संस्कृति संरक्षण र पर्यटन प्रवद्र्धनका लागि २८ पिर्के रोटे पिङ

लमजुङ । लमजुङमा संस्कृति संरक्षण र पर्यटन प्रवद्र्धनका लागि गाउँलेले झन्डै ५ लाख खर्चेर २८ पिर्के रोटे पिङ बनाएका छन् । बेंसीसहर नगरपालिका–४ को फोस्रेगाउँका बासिन्दाले २८ पिर्के रोटे पिङ बनाएका हुन् ।

संस्कृति संरक्षण र पर्यटन प्रवद्र्धन गर्ने उद्देश्यले ती गाउँलेले २८ पिर्के रोटे पिङ बनाएको बताएका छन् । उनीहरूलाई त्यस कामका लागि करिब २ महिना लगाएर रोटे पिङ हालेको बताएका छन् । त्यसका लागि गाउँ छिमेक र नजिकको जंगलमा पाइने चिलाउने र लाँकुरीका काठ प्रयोग गरी सो कार्य गरेको स्थानीय बुद्ध मिलन युवा क्लबका अध्यक्ष मीनबहादुर तामाङले बताए । उनका अनुसार प्रायः बडा दसैं र तिहारको उत्सवका बेलामा थप रौनक भर्न रोटे पिङ बनाउने प्रचलन रहेको थियो तर ऐले जिल्लाका अधिकांश जनजाति बस्ती ग्रामीण पर्यटनतर्फ आकर्षित भएका छन् । सो रोटे पिङ फोस्रे गाउँमा रहेका तामाङ समुदायको सक्रियतामा बनाइएको हो ।