नक्कली शरणार्थी प्रकरणपछि देउवा, ओली र दाहालका अस्वाभाविक ‘म्याराथन बैठक’

काठमाडौँ– आइतबार बिहान प्रधानमन्त्रीको सरकारी निवास बालुवाटारमा प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, पूर्वप्रधानमन्त्रीद्वय नेपाली कांग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओलीले लामो छलफल गरे। वैशाख २१ यता यी तीन नेताबीच पटक–पटक कहिले त्रिपक्षीय त कहिले द्विपक्षीय बैठक–छलफल चलिरहेको छ। आइतबारको बैठक भने केही फरक थियो। आइतबार उनीहरू आफ्नो पार्टीका दोस्रो तहका नेताहरूलाई समेत लिएर छलफलमा बसेका थिए।