हराएका विद्यार्थीको उद्धार

काठमाडौँ, कात्तिक २८ गते ।

विद्यालयबाट छुट्टी मनाउन ललितपुरको फुल्चोकी जङ्गल पुगेका चार जना विद्यार्थी बाटो बिराएर हराएपछि ११ घण्टापछि प्रहरीले उद्धार गरेको छ । काठमाडौँको मूलपानीमा रहेको नेपाल राष्ट्रिय निर्माण माध्यमिक विद्यालय कक्षा ११ र १२ मा पढ्ने विद्यार्थी शनिबार फुल्चोकीमा घुम्न गएका थिए । विद्यालयका नौ जना शिक्षकसहित घुम्न गएका विद्यार्थीमध्ये चार जना दिउँसो करिब २ बजे फर्किने क्रममा हराएका थिए । विद्यार्थी समूहबाट छुट्टिएर छोटो बाटो रोज्ने क्रममा खोटाङका नारायणकुमार भट्टराई, अर्घाखाँचीका अशोक विक, दोलखाका अर्जुन विक र मकवानपुर हेटौँडाका रमेश विष्ट जङ्गलमा हराएका थिए ।