कम सुताइले रोग र दुर्घटना बढाउँदै

मानवजीवन सुखी, खुशी बनाउनका लागि स्वस्थ जीवन हनुपर्छ । स्वस्थ जीवनका लागि कम्तीमा ८ घन्टा मजाले निदाउनुपर्छ । निद्रा पुगेन भने शरीरमा रोगको बाटो खुल्छ र मानिसले चाहेका भन्दा नचाहेका विषयहरुले बढी दुःख दिन थाल्छन् । मानिसको जीवन जिउने कला र सक्रियताका लागि पूरा समय निद्रा लाग्नु सबैभन्दा महत्वपूर्ण पक्ष हो ।

कन्सल्टेन्ट पल्मोनोलोजिस्ट एन्ड स्लिप मेडिसिन विशेषज्ञ डा. राजु पंगेनीका अनुसार निद्रा मानिसको शरीरलाई नभई नहुने कुरा हो । मानिसको शरीरलाई स्वस्थ बनाउन, शारीरिक वृद्धि विकास, दिमागलाई ऊर्जावान् बनाई शरीरलाई तन्दुरुस्त राख्न, रोग–प्रतिरोधात्मक क्षमतालाई स्थिर राख्न, अध्ययन–अध्ययापन गर्न, लेखपढलगायतका नयाँ–नयाँ सृजना गर्नका लागि दिमागलाई आरामको खाँचो पर्दछ । जब मानिसले पूर्ण गुणस्तरीय निद्रा पाउँछ तबमात्र यस्ता काम गर्न सक्छ ।