बजेट एउटा सकारात्मक 'प्रस्थान बिन्दु', तर निजी क्षेत्र अझै 'पर्ख र हेर' को स्थितिमा :कमलेश अग्रवाल(भिडियो )

नेपाल चेम्बर अफ कमर्सका अध्यक्ष कमलेश अग्रवालले वर्तमान सरकारले लिएको ७ प्रतिशतको आर्थिक वृद्धिको लक्ष्य हासिल गर्न निजी क्षेत्रसँगको सहकार्य र 'विस्तारकारी' मौद्रिक नीति अनिवार्य रहेको बताएका छन्। अर्थ संसारसँगको विशेष कुराकानीमा अध्यक्ष अग्रवालले आगामी आर्थिक वर्षको बजेटलाई निजी क्षेत्रका लागि एउटा सकारात्मक 'प्रस्थान बिन्दु' का रूपमा चित्रण गरे पनि कार्यान्वयनको पाटो अझै चुनौतीपूर्ण रहेको उल्लेख गरेका छन् ।

अध्यक्ष अग्रवालका अनुसार वि.सं. २०७२ को संविधान जारी भएपछि निजी क्षेत्र निकै उत्साहित थियो, जसका कारण लगातार तीन वर्षसम्म औसत ७.७ प्रतिशतको आर्थिक वृद्धि हासिल भएको थियो । तर, कोभिड–१९ पछि अर्थतन्त्रको कुशल व्यवस्थापन हुन नसक्दा र पछि अपनाइएको संकुचनकारी नीतिका कारण अर्थतन्त्र गम्भीर मोडमा पुगेको उनको विश्लेषण छ।