बीमा र धितोको लोभले आफ्नै सुन पसलमा आफैँ चोरी, सीसीटीभीबाट खुल्यो सबै रहस्य

इलाका प्रहरी कार्यालय बुटवलमा १८ जेठमा बुटवल उपमहानगरपालिका–५ अमरपथस्थित तिनाउ सुनचाँदी पसलमा चोरी भएको खबर आयो । घटनाबारे जानकारी प्राप्त हुनासाथ तत्काल प्रहरी टोली घटनास्थलमा पुग्यो । प्रहरी पुग्दा पसलबाट लकरसमेत खोलेर ठूलो परिणाममा सुनचाँदी चोरी भएको थियो ।

पसल सञ्चालक बुटवल–३ पुल्चोकका दीपक विक पोखरा गएको खबर प्रहरीले पायो । प्रहरीले घटनास्थलबाट आवश्यक प्रमाण संकलन गरी सूक्ष्म अनुसन्धान सुरु गर्‍यो । पसलमा राखिएको सीसीटीभी क्यामेरा हेर्न खोज्दा बिग्रिएको थियो । त्यही पसलभित्र चाबीको एउटा ठूलो झुम्पो फेला परेको थियो । तर, त्यो चाबीको झुम्पो उक्त सुनचाँदी पसलको थिएन ।

अझै अचम्मको कुरा त के छ भने पसलको च्यानल गेट र सटर दुवैलाई तोडिएको थिएन । पसलको सीसीटीभी क्यामेरा बिग्रेको समयमा चोरी भएकाले घटना शंकास्पद देखिएको प्रहरीको अनुमान थियो ।

अन्ततः प्रहरीको अनुसन्धानबाट चोरीमा पसल सञ्चालक र कर्मचारीकै संलग्नता रहेको खुलेको छ । घटनाबारे एक हप्ताको अनुसन्धानबाट पसल सञ्चालक दीपक विक र कर्मचारी नवीन विकको संलग्नता पुष्टि भएको रूपन्देही प्रहरी प्रमुख प्रहरी उपरीक्षक जनकबहादुर शाहीले बताए ।

‘पसलको बीमा दाबी गर्न, अन्य ग्राहकहरूले पसलमा धितोमा राख्न दिएको सुन, पैसा फिर्ता गर्न नपर्ने सोच र योजनाबद्ध रूपमा चोरीको नाटक गरेको देखिन्छ,’ प्रहरी उपरीक्षक शाहीले भने, ‘दीपक र नवीन राति साढे ११ बजे नाटकीय रूपमा ‘मास्टर की’ प्रयोग गरी पसलमा पसेर साढे दुई बजे पसलबाट सुनचाँदी उठाएर सिद्धबाबामा राखेको गाडी चलाएर पोखरातर्फ गएको विभिन्न सीसीटीभी फुटेजबाट देखिन्छ ।’

चोरी हुँदाको समयमा पसल सञ्चालक दीपक पोखरा गएको प्रहरीलाई बताए पनि अनुसन्धानबाट उनी बुटवलमै भएको खुलेको छ । पसलबाट १ करोड ४६ लाख ९४ हजार ७०० रूपैयाँको सुनचाँदीका गहना चोरी भएको घटनाको सम्बन्धमा प्रहरीले विभिन्न आयामबाट अनुसन्धान गरेको थियो । घटनाको खोजी गर्न प्रहरीले विभिन्न स्थानका १५० वटा सीसीटीभी फुटेजहरू अध्ययन गरेपछि पुष्टि भएको हो । चोरी भएको मध्ये ५ तोला सुन र २५ तोला चाँदी दीपकको घरबाट बरामद भएको प्रहरी उपरीक्षक शाहीले बताए ।

पसलका सञ्चालक दीपकले करिब ७० तोला बराबरको सुनका गहना र काचो सुन चोरी भएको प्रहरीलाई बताएका थिए । पसलबाट लगेको सुन पनि हिनामिना गर्ने उद्देश्य देखिन्छ । 'हामीले विभिन्न आयामबाट अनुसन्धान गर्दा उहाँहरू नै हो भन्ने पत्ता लागेपछि उहाँहरूलाई सार्वजनिक गरिएको हो,’ प्रहरी उपरीक्षक शाहीले थपे, ‘यो घटनामा योभन्दा बढी परिणामको सुनचाँदी पनि हुनसक्छ भन्ने हाम्रो अनुमान छ । त्यो विस्तारै खुल्दै गएपछि सार्वजनिक गर्ने छौँ ।’

इलाका प्रहरी कार्यालय बुटवलका प्रहरी नायब उपरीक्षक निशान्त श्रीवास्तवले गहिरो अनुसन्धान र सीसीटीभी क्यामेराका विभिन्न स्थानका रेकर्डबाट पुष्टि गर्न सहज भएको बताए । दीपक र नवीनलाई पक्राउ गरी आपराधिक विश्वासघात मुद्दामा म्याद लिएर अनुसन्धान भइरहेको प्रहरी नायब उपरीक्षक श्रीवास्तवले बताए ।

उक्त पसल भाडाको सटरमा करिब ४० वर्षदेखि सञ्चालनमा छ । पसलमा एकजना आफन्त र एकजना कामदार गरी दुई जना कर्मचारी थिए । सोहीअनुसार प्रहरीले विभिन्न कोणबाट अनुसन्धान गर्दा सञ्चालक र आफन्तसमेत रहेका कर्मचारी नवीनको नै सम्लग्नता भेटिएको प्रहरी नायब उपरीक्षक श्रीवास्तवले बताए ।

त्यस्तैगरी. १९ जेठमा बुटवल–५ विकास पथस्थित देव सुनचाँदी पसलमा चोरी गर्न ताला काट्दै गरेको अवस्थामा प्रहरीले ७ जनालाई पनि पक्राउ गरी अनुसन्धान अघि बढाएको छ । घटनमा भारतको उत्तर प्रदेश घर भएकाहरू रहेका छन् ।

पक्राउ पर्नेहरूमा भारतको उत्तर प्रदेश, सन्तकवितारका २६ वर्षीय आकाश बर्मा, सोही ठाउँका २७ वर्षीय अब्दुल सलमा, १९ वर्षीय नसिर अली, वर्ष २३ वर्षीय मोहम्मद सुलेमान, २८ वर्षीय शहिद मोहम्मद सेख, २१ वर्षीय कर्ण शर्मा र २३ वर्षीय मोहम्मद पारिस रहेका छन् ।

त्यस्तै, ४ जेठमा बुटवल उपमहानगरपालिका वडा नम्बर–८ सुख्खानगरस्थित राजेशकुमार गुप्ताको घरको सुनचाँदी चोरी गर्ने कपिलवस्तु जिल्लाको कपिलवस्तु नगरपालिका वडा नम्बर–२ का २७ वर्षीय शिवओम थारुलाई पक्राउ गरेको छ । घरबाट चोरी गरेको सुनका बाला २ वटा, लकेटसहित सिक्री १ थान, सुनका चार वटा झुम्का, आँैठी ३ वटालगायतका गहना प्रहरीले बरामद गरेको छ । घटनाबारे थप अनुसन्धान भइरहेको प्रहरी नायब उपरक्षिक श्रीवास्तवले बताए ।

प्रकाशित मिति: बुधबार, जेठ २७, २०८३

२०:५५