डेढ करोडको सुन चोरीको झुठो नाटक: उजुरी दिने सञ्चालक र कामदार नै निस्किए ‘मास्टरमाइन्ड’

रुपन्देहीको बुटवलस्थित अमरपथमा रहेको तिनाउ सुनचाँदी पसलमा करोडौंको चोरी भएको नाटक गर्ने सञ्चालक र कामदारलाई प्रहरीले पक्राउ गरेको छ।

गत जेठ १७ गते राति पसलको सटर तोडी १ करोड ४६ लाख ९४ हजार ७०० रुपैयाँ बराबरको सुनचाँदी चोरी भएको भन्दै उजुरी दिने सञ्चालक र कामदार नै सो घटनाका मुख्य योजनाकार रहेको खुलेको हो।

पक्राउ पर्नेहरूमा बुटवल उपमहानगरपालिका–३ पुल्चोक बस्ने ४१ वर्षीय पसल सञ्चालक दिपक बि.क. र सोही पसलमा काम गर्ने तिलोत्तमा नगरपालिका-२ वनवाटिकाका ४७ वर्षीय कामदार नविन बि.क. रहेका छन्।

उनीहरूले योजनाबद्ध रूपमा पसलको सटरको साँचो तोडेर सेफभित्र रहेका महँगा गरगहना चोरी भएको भन्दै प्रहरीमा झुठो विवरण बुझाएका थिए।

लुम्बिनी प्रदेश प्रहरी कार्यालय, नेपाल प्रहरी प्रदेश कार्यालय लुम्बिनी, जिल्ला प्रहरी कार्यालय रुपन्देही र इलाका प्रहरी कार्यालय बुटवलको संयुक्त टोलीले घटनाको सुक्ष्म अनुसन्धान गरेको थियो।

अनुसन्धानका क्रममा उनीहरूले बिमा रकम दाबी गर्ने वा अन्य कुनै स्वार्थका लागि चोरीको नाटक गरेको पुष्टि भएपछि प्रहरीले दुवैलाई नियन्त्रणमा लिएको हो।

प्रहरीले सञ्चालक दिपक बि.क. को घरमा खानतलासी गर्दा लुकाएर राखिएको अवस्थामा ५ तोला ४.१ लाल तौलको सुनका गरगहना र १४ केजी ३०० ग्राम चाँदी बरामद गरेको छ।

बरामद चाँदीमा सिक्का, दाना र ढिक्काहरू रहेका छन्। उनीहरूले सेफ खाली गराएर गहनाहरू आफ्नै घरमा सुरक्षित राखेको र बाहिर चोरी भएको हल्ला फैलाएको प्रहरी अनुसन्धानबाट खुलेको छ।

इलाका प्रहरी कार्यालय बुटवलका अनुसार आरोपितहरूले सुरुमा अज्ञात समूहले पसल लुटेको भन्दै प्रहरीलाई अल्मल्याउने प्रयास गरेका थिए। तर, घटनास्थलको प्रकृति र उनीहरूको बयानमा देखिएको विरोधाभासका कारण प्रहरीले उनीहरूमाथि नै निगरानी बढाएको थियो।

पक्राउ परेका दुवै जनालाई हिरासतमा राखी चोरी तथा ठगी सम्बन्धी कसुरमा थप अनुसन्धान अघि बढाइएको प्रहरीले जनाएको छ।

Follow @nagarik_news