कन्सलटेन्ट फर्मासिस्ट: नेपालको स्वास्थ्य प्रणालीमा हराइरहेको एउटा महत्त्वपूर्ण कडी

आजको स्वास्थ्य सेवा पहिलेभन्दा धेरै जटिल बन्दै गएको छ। मानिसहरूको आयु बढ्दै गएको छ, मधुमेह, उच्च रक्तचाप, मुटुरोग, क्यान्सर तथा मिर्गौला रोगजस्ता नसर्ने रोगहरू तीव्र रूपमा बढिरहेका छन्, र धेरै बिरामीले एकैसाथ धेरै औषधि सेवन गर्नुपर्ने अवस्था छ। औषधिले जीवन बचाउँछ, रोग नियन्त्रण गर्छ र जीवनस्तर सुधार्छ। तर औषधिको संख्या बढ्दै जाँदा गलत औषधि प्रयोग, औषधिबीचको अन्तरक्रिया, अनावश्यक औषधि, गम्भीर साइड इफेक्ट तथा औषधिसम्बन्धी त्रुटिको जोखिम पनि बढ्दै जान्छ। यही चुनौतीको समाधानका रूपमा विश्वका विकसित देशहरूले कन्सलटेन्ट फर्मासिस्ट को अवधारणालाई स्वास्थ्य सेवाको अभिन्न अंग बनाएका छन्।

कन्सलटेन्ट फर्मासिस्ट भनेका औषधि विज्ञान र क्लिनिकल उपचारमा उच्च दक्षता हासिल गरेका विशेषज्ञ फार्मासिस्ट हुन्। उनीहरूको भूमिका औषधि बेच्ने वा वितरण गर्ने मात्र होइन, बिरामीका लागि सबैभन्दा सुरक्षित, प्रभावकारी र वैज्ञानिक आधारमा औषधि छनोट गर्ने, चिकित्सक तथा नर्ससँग मिलेर उपचार योजना तयार गर्ने, औषधिको प्रभाव मूल्याङ्कन गर्ने, औषधिबाट हुन सक्ने जोखिम घटाउने तथा बिरामीलाई सही औषधि सही तरिकाले प्रयोग गर्न सहयोग गर्ने हो।