एभरेष्ट बैङ्कद्वारा नेपाल प्रहरी - एभरेष्ट बैङ्क छात्रवृत्ति अक्षय कोष स्थापना 

काठमाडौँ / एभरेष्ट बैङ्कले २५ लाख रुपैयाँको ‘नेपाल प्रहरी – एभरेष्ट बैंक अक्षय कोष’को स्थापना गर्ने भएको छ । बैङ्कले एक कार्यक्रमकाबीच नेपाल प्रहरी प्रधान कार्यालय, प्रहरी कल्याण कोषसँग उक्त कोष स्थापना गर्ने सम्बन्धको समझदारी पत्रमा हस्ताक्षर गरेको हो ।

संस्थागत सामाजिक उत्तरदायित्व अन्तर्गत नेपाल पुलिस स्कुलहरूमा अध्ययन गर्ने अमर÷सहिद एवम् अशक्त, अवकाश प्राप्त, प्र.का.स. देखि प्र.व.ह. दर्जा सम्मका उत्कृष्ट अंक प्राप्त गर्ने नेपाल प्रहरीका सन्ततीहरूलाई उत्प्रेरणा स्वरूप जेहेन्दार छात्रवृत्ति प्रदान गर्ने उद्देश्य सो सम्झौता गरेको बैङ्कले जनाएको छ ।

नेपाल प्रहीका प्रहरी महानिरीक्षक धिरज प्रताप सिंह र बैंकका तर्फबाट प्रमुख कार्यकारी अधिकृत सुदेश खालिङको उपस्थितिमा नेपाल प्रहरी प्रहरी कल्याण कोषका प्रहरी वरिष्ठ उपरिक्षक केदार ढकाल र बैंकका नायब महाप्रबन्धक केशव राज पौडेलले सम्झौता पत्रमा हस्ताक्षर गरे ।

सो कार्यक्रमा नेपाल प्रहरीका उच्च पदस्थ अधिकारीहरूका साथै बैंकका तर्फबाट बजार तथा संस्थागत निक्षेप विभाग प्रमुख पुष्प राज उप्रेतीको समेत उपस्थिति रहको थियो ।

सो समारोहमा बैंकका प्रमुख कार्यकारी अधिकृत सुदेश खालिङले उक्त स्थापना गरिएको अक्षय कोषबाट नेपाल प्रहरीका अमर÷सहिद एवम् अशक्त, अवकाश प्राप्त अधिकारीहरुका सन्ततीहरूलाई स्थापित अक्षय कोषले शैक्षिक जिवन उन्नत बनाउने विश्वास व्यक्त गरे ।

पंजाब नेशनल बैंक भारतसँग संयुक्त साझेदार रहेको तथा स्थापना कालदेखि नै ग्राहकहरूको पहिलो रोजाइको यस बैंकमा हालसम्म करिब १३ लाख भन्दा बढी सन्तुष्ट ग्राहकहरू छन् ।

बैङ्कले १२४ शाखा संजाल, ३ एक्सटेन्सन काउण्टर, ७ प्रादेशिक कार्यालयहरु, १६० एटिएम सहित विश्वव्यापी नेटवर्कबाट अत्याधुनिक मोबाइल, इन्टरनेट र एसएमएस बैकिंग सुबिधा प्रदान गर्दै आइरहेको छ । यस बैंकले नेपाल सरकारको राजस्व सङ्कलनको लागि ३२ वटा सङ्कलन केन्द्रबाट समेत सेवा दिँदै आइरहेको छ ।