माओवादीको तीन महिने अभियान : ढलेका गेट उठाउँदै, सहिदका चिहान सफा गर्दै

विराटनगर । नेकपा माओवादी केन्द्र कोशी प्रदेशका अध्यक्ष हर्कबहादुर नेम्वाङले तीन महिने अभियान अन्तर्गत इलामको माइजोगमाईमा सहिदको चिहान सरसफाइ गरेको तस्बिर र फोटो सामाजिक सञ्जालमा शेयर गरेका छन् । माओवादीका स्थानीय कार्यकर्ताले माईजोगमाईको १ नम्बर वडास्थित जनयुद्धका सहिद चन्द्रकला सुवेदी र हिमालको समाधिस्थललाई सरसफाइ अनि झण्डा गाडेर तीन महिने अभियान शनिबार उद्घाटन गरेका थिए ।

सहिदको चिहान सफाइको फोटो नै माओवादी केन्द्रका प्रदेश अध्यक्ष नेम्वाङले किन प्राथमिकताका साथ शेयर गरे ? जवाफमा नेम्वाङले भने, ‘सहिदहरुको सपना पूरा गर्न हामीले पहिले सहिदहरुको चिहान सफा गर्न लागेका हौँ । उहाँहरुको योगदान सम्झेका छौँ । अब सबै माओवादीहरुले सहिदको चिहानमा गएर एक पटक सोच्ने, प्रतिबद्धता गर्ने र अगाडि बढ्ने बेला आएको छ ।’