विगतका कमजोरी यो सरकारका लागि बहाना बन्न सक्दैनन् : सुशान्त वैदिक

३० असार, काठमाडौं । राष्ट्रिय स्वतन्त्र पार्टीका सांसद सुशान्त वैदिकले गणेश नेपाली, अश्विन रावत र विवेक मण्डल प्रति श्रद्धाञ्जली व्यक्त गरेका छन् । मंगलबारको प्रतिनिधिसभालाई सम्बोधन गर्दै उनले विगत केहि दिनमा भएका दु:खद् घटनाहरूले नेपाल राष्ट्रको आत्मालाई छोएको उल्लेख गर्दै केहि परिवारहरुले आफ्नो प्रियजन गुमाएको बताएका हुन् ।

‘केहि जीवनहरु यस्ता पिडामा पुगे जहाँ उनीहरुले आफ्नो अस्तित्व नै अन्तिम सन्देश बनाउने निर्णय गरे । यी घटनालाई केवल व्यक्तिगत कमजोर भनेर हेर्न मिल्दैन र एउटा सरकार एउटा कार्यालय वा एउटा निर्णयलाई दोष दिएर पनि हामी सत्यको नजिक पुग्दैनौँ’ उनले भने, ‘राष्ट्र एउटा निर्जीव संरचना होइन, राष्ट्र एउटा जीवित अस्तित्व हो यसको स्वास्थ्य केवल सडक भवन र आर्थिक सूचकहरुले मापन हुँदैन ।’