सुनचाँदी पसलमा साहु स्वयम्ले चोरी गर्न थालेपछि ...

बुटवल ५ अमरपथमा जेठ १७ गते राति भएको तिनाउ सुनचादी पसल चोरीको घटनामा सञ्चालक आफैको संलग्नता रहेको खुलासा भएको छ । तिनाउ सुनचाँदी पसलबाट ठूलो परिणाममा सुनचाँदी चोरी भएको भन्दै प्रहरीलाई पसल सञ्चालकले नै खबर गरेका थिए ।

पसलका सञ्चालक दीपक विक र कर्मचारी नवीन विक आफैंले पसल खोली गरगहना र सुनचाँदी चोरी गरेको ‘ड्रामा’ प्रहरीको अनुसन्धानले पर्दाफास गरेको हो। घटनाको खोजी गर्न प्रहरीले विभिन्न स्थानका १५० वटा सीसीटीभी फुटेज अध्ययन गरेको थियो।

नाटकीय रूपमा ‘मास्टर की’ बनाएर सञ्चालक बुटवल–५ बस्ने दीपक पसलका गहना उठाएर पोखरा घुम्न गएको नाटक मञ्चन गरेको पुष्टि भएको रुपन्देही प्रहरी प्रमुख, प्रहरी उपरीक्षक जनक शाहीले बताउनुभयो ।

‘पसलको बिमा दाबी गर्न र अन्य ग्राहकले पसलमा धितोमा राख्न दिएको सुन र पैसा फिर्ता गर्न नपर्ने सोच एवं योजनाबद्ध रूपमा चोरीको नाटक गरेको देखिन्छ’ एसपी शाहीले भन्नभयो, ‘दीपक र नवीन राति साढे ११ बजे पसलमा पसेर, साढे २ बजे पसलबाट सुनचाँदी उठाएर सिद्धबाबामा राखेको गाडी चलाएर पोखरातर्फ गएको सीसीटीभी फुटेजबाट देखिन्छ ।’

पसलबाट १ करोड ४६ लाख ९४ हजार ७०० रूपियाँको सुनचाँदीका गहना चोरी भएको घटनाको सम्बन्धमा प्रहरीले विभिन्न कोणबाट अनुसन्धान गरेको थियो । १९ गते बिहान स्थानीयले पसल खुला देखेपछि प्रहरीलाई खबर गरेका थिए । प्रहरी त्यहाँ पुग्दा ५०६० वटा नक्कली चाबीका झुप्पा फेला पारेको थियो । त्यस्तै, दुईवटा लकरमध्ये एउटा फोडेर त्यहाँ रहेका सबै गहना लगेको पाइएको थियो ।

‘पसलबाट लगेको सुन पनि हिनामिना गर्ने उद्देश्य देखिन्छ । हामीले विभिन्न आयामबाट अनुसन्धान गर्दा उनीहरू नै हो भन्ने पत्ता लागेपछि पक्राउ गरेर सार्वजनिक गरिएको हो’ एसपी शाहीले भन्नुभयो, ‘यो घटनामा यो भन्दा बढी परिणामको सुनचाँदी पनि हुनसक्छ भन्ने हाम्रो अनुमान छ । त्यो विस्तारै खुल्दै गएपछि सार्वजनिक गर्नेछौं ।’

विलाश मोहन वझानथाछेको घरमा सटर भाडामा लिएर तिनाउ सुनचाँदी पसल चार दशकदेखि सञ्चालनमा रहँदैआएको थियो । पहिला दीपकका बाबा तुलबहादुरले सञ्चालन गर्दैआएको पसलपछि विकले सञ्चालन गर्दैआएका थिए । इलाका प्रहरी कार्यालय बुटवलका डीएसपी निशान्त श्रीवास्तवले गहिरो अनुसन्धान र सीसीटीभी क्यामेराका विभिन्न स्थानका रेकर्डबाट पुष्टि गर्न सजिलो बनाएको बताउनुभयो ।

पसलबाट चोरी भएका केही गहना दीपकको घर बुटवल–५ बाट प्रहरीले फेला पारेको छ । त्यस्तै, जेठ १९ गते देव सुनचाँदी पसलमा चोरी गर्न ताला काट्दै गरेको अवस्थामा प्रहरीले ७ जनालाई पनि पक्राउ गरी अनुसन्धान अघि बढाएको छ । पक्राउ पर्नेमा भारतको उत्तर प्रदेश घर भएकाहरू रहेका छन् ।

त्यस्तै, जेठ ४ गते बुटवल उपमहानगरपालिका वडा नम्बर–८ सुक्खानगरस्थित राजेश कुमार गुप्ताको घरको सुनचाँदी चोरी गर्ने कपिलवस्तु जिल्लाको कपिलवस्तु नगरपालिका २ का २७ वर्षीय शिवओम थारूलाई पक्राउ गरेको छ । घरबाट चोरी गरेको सुनका बाला २ वटा, लकेटसहित सिक्री १ थान, सुनका चार वटा झुम्का, औंठी ३ वटा लगायतका गहना प्रहरीले बरामद गरेको छ ।इलाका प्रहरी कार्यालय बुटवलले बरामद गरेको सुनचादीका गहना ।