उल्झनमै निजगढ अन्तर्राष्ट्रिय विमानस्थल

बाराको निजगढमा प्रस्तावित दोस्रो ठुलो अन्तर्राष्ट्रिय विमानस्थल निर्माण कार्य कछुवा गतिमा पनि अगाडि बढ्न सकेको छैन। अन्तर्राष्ट्रिय विमानस्थल निर्माण अगाडि नबढ्नुको मुख्य कारण सरकारले ठोस बजेट विनियोजन नगर्नु हो। अन्य कारणमा वातावरणीय र कानुनी अड्चन पनि छन्। संस्कृति, पर्यटन तथा नागरिक उड्डयन मन्त्रालयअन्तर्गतको नेपाल नागरिक उड्डयन प्राधिकरणको वातावरणीय प्रभाव मूल्यांकन (इआइए) प्रतिवेदनमा विमानस्थल निर्माणका लागि ठुला, साना र मझौला गरी करिब २४ लाख रूख कटान गर्नुपर्ने तथा एक हजार चार सय घरधुरी स्थानान्तरण गर्नुपर्ने उल्लेख छ। साथै वन फँडानी, जलस्रोत, जैविक विविधता, वन्यजन्तुको बासस्थान र स्थानीय बस्तीमा पर्ने प्रभावले निजगढ अन्तर्राष्ट्रिय विमानस्थल निर्माण विगतदेखि नै विवादमा पर्दै आएको छ।

मुआब्जा वितरण, कानुनी जटिलता, वातावरणीय प्रश्न र निर्माण प्रक्रियासम्बन्धी विवादका कारण आयोजना पटकपटक अवरुद्ध हँुदै आएको छ। सरकारले पटकपटक राष्ट्रिय गौरवको आयोजनाका रूपमा परियोजनालाई पुनर्जीवित गर्ने प्रयास गरे पनि संरक्षणकर्मी, वातावरणविद् र हवाई क्षेत्रका विज्ञहरूले त्यसको आवश्यकतामाथि प्रश्न उठाउँदै आएका छन्। निजगढ अन्तर्राष्ट्रिय विमानस्थल निर्माण प्रक्रिया अगाडि बढाउन वर्तमान सरकारले भने बजेट छुट्याएको इन्जिनियर सुनिलकुमार दासले बताए। आफू भर्खरै सरुवा भएर आएको प्रतिक्रिया दिँदै इन्जिनियर दासले अब निजगढ अन्तर्राष्ट्रिय विमानस्थल निर्माण कार्य कुन मोडेलमा अगाडि बढाउने भन्ने विषयमा बहस चलिरहेको बताए।