वृक्षारोपणमा जुट्दै राउटे समुदाय

सुर्खेत । घुमन्ते फिरन्ते जीवन बिताउने र रूख काटेर काठका भाँडा–कुँडा बनाउने समुदायका रूपमा चिनिएका राउटे समुदाय वृक्षारोपण गर्नतर्फ अग्रसर हुन थालेका छन् । अहिले नयाँ परिचय बनाउँदै छन् । पुस्तौंदेखि वनलाई जीविकोपार्जनको आधार बनाउँदै आएका उनीहरू अहिले त्यही वन जोगाउने अभियानमा पनि सक्रिय देखिन थालेका छन् ।

सुर्खेतको सिम्ता गाउँपालिका–९ खानीखोलास्थित चोल्पा चौतारा सामुदायिक वनमा शनिवार यस्तै दृश्य देखियो । राउटे बस्तीबाट करिब एक किलोमिटर टाढा रहेको वन क्षेत्रमा समुदायका करिब ४० जना सदस्यले सामूहिक रूपमा पाँच सय बिरुवा रोपेका छन् । रिठा, बकैना, इपिलिपि तथा विभिन्न फूल प्रजातिका बिरुवा रोप्दै उनीहरूले वन संरक्षणप्रति आफ्नो प्रतिबद्धता व्यक्त गरेका छन् ।