भक्तपुरको रानीपोखरी पुनर्निर्माणसम्बन्धी प्रतिवेदन हस्तान्तरण

भक्तपुर। भक्तपुर नगरपालिका वडा नं. १ सल्लाघारीस्थित ऐतिहासिक रानीपोखरी पुनर्निर्माणसम्बन्धी रानीपोखरी अध्ययन समितिद्वारा तयार गरिएको प्रतिवेदन हस्तान्तरण गरिएको छ। समिति कार्यदलका संयोजक इतिहासविद् प्रा.डा. पुरुषोत्तमलोचन श्रेष्ठले उक्त प्रतिवेदन नगरपालिकाका प्रमुख सुनिल प्रजापतिलाई हस्तान्तरण गरेका हुन्।

कार्यक्रममा रानीपोखरी अध्ययन समिति कार्यदलका संयोजक प्रा.डा. पुरुषोत्तमलोचन श्रेष्ठले कान्तिपुरको रानीपोखरी निर्माणभन्दा ४० वर्ष अगाडि बनेको भक्तपुरको रानीपोखरीको पुरातात्विक नाम ‘न्हुपुखु’ रहेको बताएका छन्। रानीपोखरीको ऐतिहासिक महत्त्वमाथि प्रकाश पार्दै प्रा.डा. श्रेष्ठले ५ महिनाको छोटो समयावधिमा भक्तपुरको रानीपोखरीको निर्माण भएको इतिहास त्यहाँ अवस्थित शिलालेखहरूबाट थाहा हुन आएको बताएका छन्।