बंगलादेशमा आरक्षणको विरोधमा हिंसात्मक प्रदर्शन भएपछि शैक्षिक संस्था बन्द

हालै बंगलादेशमा सरकारी जागिरमा आरक्षणलाई लिएर भड्किएको हिंसामा ६ जनाको मृत्यु भएपछि त्यहाँका शैक्षिक संस्था अनिश्चितकालका लागि बन्द गरिएका छन् ।विगत केही दिनदेखि विश्वविद्यालयका विद्यार्थीहरूले १९७१ को मुक्ति संग्राममा लडेका सैनिकका छोराछोरीलाई सरकारी जागिरमा आरक्षणको विरोध गरिरहेका थिए।

सन् १९७१ मा पाकिस्तानबाट स्वतन्त्रताका लागि लड्नेहरूलाई यहाँ युद्ध नायक भनिन्छ। देशको एक तिहाइ सरकारी जागिर यी युद्ध वीरका सन्तानका लागि आरक्षित छ ।विगत केही दिनदेखि विद्यार्थीहरुले यसको विरोधमा र्‍याली निकाल्दै आएका छन् । यो आरक्षण प्रणाली भेदभावपूर्ण रहेको बरु योग्यताका आधारमा जागिर दिनुपर्ने विद्यार्थीको भनाइ छ ।बंगलादेशमा केही जागिरहरू महिला, जातीय अल्पसंख्यक र अपाङ्गता भएकाहरूका लागि पनि आरक्षित छन्। यो हप्ता, राजधानी ढाका लगायत देशका धेरै शहरहरूमा आरक्षणको समर्थन गर्ने विद्यार्थी र यसको विरोध गर्नेहरूबीच हिंसात्मक झडप भएको थियो।