पित्तथैलीको अपरेसन गर्न गएका पुरुषको अस्पतालले भ्यासेक्टोमी गरेपछि...

ब्यूनोस आयर्स । अस्पतालमा कहिलेकाहीँ अचम्म अचम्मका घटना हुन्छन् । रोग एउटा हुन्छ उपचार अर्कै गरिन्छ, शल्यक्रिया समेत फरक पर्छ । अर्जेन्टिनामा पनि यस्तै भएको छ । एक जना युवक पित्तथैलीको शल्यक्रिया गर्न अस्पताल गएका थिए । तर डाक्टरहरूले ती पुरुषको भ्यासेक्टोमी गरेर पठाएका छन् । यो घटना गएको हप्ताको हो । ४१ वर्षका जोर्ज बसेतो कोर्दोबाको फ्लोरेन्सियो दियाज प्रोभिन्सियल हस्पिटलमा पित्तथैलीको अपरेसनका लागि गएका थिए ।

अपरेसन फेब्रुअरी मंगलबार फेब्रुअरी २८ मा हुने भनिएको थियो । तर केही परिस्थितिका लागि अपरेसन बुधबारका लागि सर्‍यो । अपरेसनको दिनमा अस्पतालका एक कर्मचारी बिरामीको कोठामा आए । उनलाई स्ट्रेचरमा राखे अनि एक शब्द नसोधी, बिरामीको चार्ट नै नहेरी उनलाई शल्यक्रिया गर्ने कोठामा लगे । डाक्टरले पनि बिरामीको चार्टमा छड्के नजर लगाउने कष्ट गरेनन् । सो दिन जुन शल्यक्रिया गर्ने शेड्यूल थियो त्यही गरे । अर्थात् पित्तथैलीको शल्यक्रिया गर्न गएका पुरुषको भ्यासेक्टोमी गरियो ।