सुदूरपश्चिममा क्षयरोग सङ्क्रमित पत्ता लगाउनु चुनौतीपूर्ण

धनगढी । सुदूरपश्चिम प्रदेशमा क्षयरोग नियन्त्रणका लागि विभिन्न प्रयास भइरहे पनि नयाँ बिरामी पत्ता लगाउने कार्य अझै चुनौतीपूर्ण देखिएको छ । सुदूरपश्चिम स्वास्थ्य निर्देशनालयका अनुसार प्रदेशमा क्षयरोग भएर पनि पत्ता नलागेका बिरामीको सङ्ख्या धेरै हुन सक्छ । स्वास्थ्य प्रणालीको पहुँच बाहिर रहेका कैयौँ नागरिकमा क्षयरोग सङ्क्रमण हुन सक्ने जोखिम छ ।

स्वास्थ्य निर्देशनालयका क्षयरोग फोकल पर्सन मनोज प्रसाद ओझाका अनुसार आर्थिक वर्ष २०८२/०८३ मा सुदूरपश्चिम प्रदेशमा ६ हजार ३८४ नयाँ क्षयरोगी पत्ता लगाउने लक्ष्य राखिएको थियो । जबकि ३ हजार ६५१ जना मात्र नयाँ बिरामी फेला परेका छन् । यो लक्ष्यको ५७ प्रतिशतमात्र हो ।