मकवानपुर १ का एमाले मतदाताले कमल थापालाई नपत्याएका हुन् ?

राप्रपा नेपालका अध्यक्ष कमल थापा सूर्य चिन्हबाट प्रतिनिधि सांसदमा विजयी हुने आशामा नेकपा एमालेका अध्यक्ष केपी शर्मा ओलीसँगको लबिङमा टिकट हात पारे । नेकपा एमाले मकवानपुरभित्र थापालाई टिकट दिएकै कारण विवाद उब्जियो । मनोनयन दर्ताको दिन एमाले कार्यकर्ताले नै थापाविरुद्ध नाराबाजी गरेर पार्टी कार्यालयमा ताला नै लगाएका थिए । यस्तो माहोलको बीचमा पनि पार्टी नेतृत्व तहको बलमा थापाले मकवानपुर प्रतिनिधिसभा क्षेत्र नम्बर १ का लागि उम्मेदवारी दर्ता गराएका थिए ।

राप्रपा नेपालको झण्डा र चुनाव चिन्ह नै भुलेर थापा नेकपा एमालेको सूर्य चिन्हमा मख्ख पर्दै चुनावी प्रचारप्रसारमा लागिरहे । मंसिर ४ गते आम्निर्वाचन सम्पन्न पनि भयो । आइतबार रातिसम्म जिल्लाका सबै मतपेटीका हेटौंडा आइपुगेपछि सोमबार बिहानदेखि मतगणना सुरु गरियो । प्रारम्भिक मतगणना देखि नै थापाको मुख्य प्रतिद्धन्द्वीको रुपमा रहेका लोकतान्त्रिक बाम गठबन्धनकी साझा उम्मेदवार नेपाली कांग्रेसकी महालक्ष्मी उपाध्याय (डिना)ले अग्रता जमाइरहिन् । सुरुवातदेखि नै थापा कहिल्यै अगाडि जान सकेका छैनन् ।