उपेन्द्र यादवसमक्ष प्रदेश २ का सांसदहरुको प्रस्ताव: मुख्यमन्त्री तत्काल परिवर्तन गरौं

जनकपुर । प्रदेश नम्बर २ को सत्तारुढ दलमा नेतृत्वप्रतिको असन्तुष्टि सतहीरुपमा छताछुल्ल भएको छ । सत्तारुढ जसपा नेपाल प्रदेश– २ को संसदीय दलको बैठकमा बोल्ने १९ जना प्रदेश सांसदले मुख्यमन्त्री राउत नेतृत्वको सरकारको कडा आलोचना गरेका हुन् । बैठकमा मुख्यमन्त्री लालबाबु राउत नेतृत्वको सरकारले जनताप्रति उत्तरदायी काम गर्न नसकेको र स्वेच्छाचारी ढंगले केहि व्यक्तिको ईशारामा पदीय मर्यादा समेत ख्यालै नगरी पदको दुरुपयोग गरेको सम्मका आरोप लगाउदैँ दर्जनभन्दा बढी प्रदेश सांसदहरुले नेतृत्वसमक्ष असन्तुष्टि पोखेका छन् ।

जसपाका केन्द्रीय अध्यक्ष उपेन्द्र यादव जनकपुर आएका बेला बसेको संसदीय दलको बैठकमा मुख्यमन्त्री राउत नेतृत्वको सरकार स्वेच्छाचारीरुपले चलेको र जनतालाई बेवास्ता गरेको आरोप सांसदहरुले लगाएका छन् । सांसदहरुले प्रदेश सरकार पूर्ण रुपमा असफल भएकोले सरकारको नेतृत्व नै परिवर्तनका लागि माग गरेका छन् ।