परिवारै मिलेर सहकारीको २ करोड ठगी

दुई करोडभन्दा बढी रकम हिनामिना गरी विगत दुई वर्षदेखि फरार रहेका पताल गङ्गा बचत तथा ऋण सहकारी संस्था बिर्तामोडका तत्कालीन अध्यक्ष रेवती खनाल पक्राउ परेका छन् ।

उनीसहित परिवारका पाँच जना मिलेर बचतकर्ताको दुई करोड ६ लाख ८ हजार ३८३ रुपैयाँ हिनामिना गरेको उनलाई आरोप छ । खनाललाई प्रहरीले गत बिहीबार कैलालीको धनगढीबाट पक्राउ गरेको हो । झापा भद्रपुर नगरपालिका घर भ ई हाल बिर्तामोड नगरपालिका ४ मा डेरा गरी बस्दै आएका ४१ वर्षीय खनाल फरार थिए । जिल्ला प्रहरी कार्यालय धनगढी कैलालीबाट पक्राउ परेका उनलाई शुक्रबार इलाका प्रहरी कार्यालय बिर्तामोडमा उपस्थित गराइएको छ ।