अबको कांग्रेस नेतृत्व : यथास्थितिको निरन्तरता कि परिवर्तनको सुरुआत?

काठमाडौं- कांग्रेस महाधिवेशनमा सभापतिको प्रतिस्पर्धामा उत्रिएका छन्, कल्याण गुरुङ, प्रकाशमान सिंह, विमलेन्द्र निधि, शेखर कोइराला र शेरबहादुर देउवा। यद्यपि, कोइराला र देउवाबीच मुख्य प्रतिस्पर्धा हुने आकलन गरिएको छ। नेतृत्व चयनका लागि कांग्रेसका महाधिवेशन प्रतिनिधिसामू अनुहार धेरै भए पनि ती दुई प्रश्नको घेरामा सीमित छन्- कांग्रेसमा यथास्थितिको निरन्तरता कि परिवर्तनको सुरुवात?

स्पष्ट छ, अहिले कांग्रेसमा यथास्थितिको निरन्तरताको प्रतिनिधित्व देउवाले गर्छन्। उनले विगत ६ वर्षसम्म कांग्रेसलाई जसरी नेतृत्व गरे, त्यसैको निरन्तरताको लागि उनी अघि सरेका छन्। भन्न त उनले पुनः जितेमा अझै राम्रोसँग पार्टी सञ्चालन गर्ने बताएका छन्। त्यसको ठोस अवधारणा भने उनीसँग छैन। त्यसैले उनको प्रतिबद्धता कुनै असफल विद्यार्थीले अर्को वर्ष राम्रोसँग पढ्छु भनेर कक्षा दोहोर्‍याउनुपर्दाको बाध्यतात्मक वाचा जस्तै देखिन्छ।