अर्को महिना फिफा विश्वकप हुने मेक्सिकोमा गोली हानी १० जनाको हत्या, आक्रमणकारी फरार

मेक्सिकोको पुएब्लाको तेहुइट्जिंगोमा आइतबार गोली हानी दश जनाको हत्या गरिएको छ। एपी समाचार एजेन्सीका अनुसार घरमा आक्रमण गर्दा यी हत्याहरू भएका हुन्। मृतकहरूमा छ जना पुरुष, तीन महिला र एक बच्चा रहेका छन्।

अधिकारीहरूका अनुसार गोली चलेको आवाज सुनेपछि छिमेकीहरूले प्रहरीलाई बोलाएका थिए। प्रहरी पुग्दा घरभित्र धेरै मानिसहरूलाई गोली लागेर घाइते भएको भेटाएका थिए। एक महिलालाई अस्पताल लगिएको थियो तर बाटोमै मृत्यु भयो।

लगभग ११ हजार ३ सय जनसंख्या भएको शहर तेहुइट्जिंगो मेक्सिको सिटीबाट लगभग २०८ किलोमिटर टाढा अवस्थित छ। जुन ११ बाट सुरु हुने फिफा विश्वकप मेक्सिकोले सह-आयोजना गर्दैछ। मेक्सिको सिटी, मोन्टेरी र ग्वाडालाजारामा १३ खेल खेलाइनेछ। राष्ट्रपति क्लाउडिया शेनबाउमले एक लाख सुरक्षाकर्मी तैनाथ गर्ने घोषणा गरेकी छिन्।

पुएब्ला सरकारले पीडितहरूलाई हतियारधारी व्यक्तिहरूले आक्रमण गरेको बताएको छ। अहिलेसम्म कसैलाई पनि पक्राउ गरिएको छैन। आक्रमणको उद्देश्य स्पष्ट छैन। अधिकारीहरूले अनुसन्धान गरिरहेका छन्। पुएब्लाका गभर्नर अलेजान्ड्रो आर्मेन्टाले पनि घटनाको बारेमा अहिलेसम्म कुनै बयान दिएका छैनन्।

राष्ट्रिय गार्ड, राज्य महान्यायाधिवक्ताको कार्यालय, राज्य र स्थानीय प्रहरी र गुप्तचर टोलीहरू पनि अनुसन्धानमा संलग्न छन्। अधिकारीहरूले आक्रमणको पछाडि को छ भनेर पत्ता लगाउने प्रयास गरिरहेको बताएका छन्।

रिपोर्टहरूका अनुसार हालैका महिनाहरूमा मध्य मेक्सिकोमा लागूऔषध कार्टेलसँग सम्बन्धित हिंसा बढेको छ, जसले गर्दा ८०० देखि १,००० परिवारहरू आफ्नो घर छोड्न बाध्य भएका छन्।

Follow @nagarik_news