बेलायतमा कोरोनाबाट एकैदिन ६०३ को मृत्यु, मृत्यु हुनेको संख्या ५९ हजार नाघ्यो

लन्डन । बेलायतमा कोरोना संक्रमण दरमा केहि दिनयता कमी देखिए पनि मृतक संख्या भने घटेको छैन । वीकेन्डका दिनमा कम देखिए पनि बाँकी दिनहरुमा भने पाँच सयको हाराहारीमा मृतक संख्या थपिदै गएका छन् । ‘डिपार्टमेन्ट अफ हेल्थ एण्ड सोशल केयर’ ले मंगलबार सार्वजनिक गरेको तथ्याँकअनुसार २४ घन्टामा थप ६०३ जना कोरोना संक्रमितको मृयु भएको छ । हिजो सोमबार २०५ जना कोरोना संक्रमितको मृत्यु भएकोमा आज यो संख्या बढेर ६ सय नाघेको छ । यससँगै बेलायतमा कोरोना संक्रमणबाट मृत्यु हुनेको संख्या ५९ हजार ५१ पुगेको छ।

यसैगरी कोरोना संक्रमितको संख्या पनि १६ लाख ४३ हजार ८६ पुगेको छ । पछिल्लो २४ घन्टामा १३ हजार ४३० जनामा नयाँ संक्रमण पुष्टि भएको स्वास्थ्य विभागले जानकारी दिएको छ । संक्रमित संख्यामा भने केहि दिन यता केहि कमि आएको छ । यसैगरी गएको २४ घन्टामा थप एक हजार ३६९ जना कोरोना संक्रमित हस्पिटल भर्ना भएका छन् । हाल बेलायतका हस्पिटलमा १५ हजार भन्दा बढी कोरोना संक्रमितको उपचार भैरहेको छ । एक हजार ४२५ जनाको भेन्टिलेटर बेडमा राखेर उपचार भैरहेको स्वास्थ्य विभागले जनाएको छ ।