केन्द्रीय कारागारबाट भाग्ने सपना पतिको डेराबाट पक्राउ

काठमाडौं । केन्द्रीय कारागार सुन्धाराबाट फरार भएकी एक महिला बन्दीलाई प्रहरीले केही घण्टामै पुनः पक्राउ गरेको छ ।

नुवाकोटको विदुर नगरपालिका–१३ घर भएकी २५ वर्षीया सपना तामाङ शुक्रबार मध्यराति सुन्धारास्थित महिला बन्दी गृहको पर्खाल नाघेर भागेकी थिइन् । उनी जन्मकैदको सजाय भुक्तान गरिरहेकी कैदी हुन्।

Advertisement

कारागारबाट भागेपछि सपना आफ्ना श्रीमान बस्दै आएको डेरामा पुगेको प्रारम्भिक अनुसन्धानबाट खुलेको प्रहरीले जनाएको छ। त्यसपछि काठमाडौँ उपत्यका अपराध अनुसन्धान कार्यालयको टोलीले उनलाई नियन्त्रणमा लिएको हो ।

प्रहरीले सपनासँगै उनका श्रीमानलाई समेत नियन्त्रणमा लिएर थप अनुसन्धान अघि बढाएको जनाएको छ । उपत्यका प्रहरी कार्यालयका प्रवक्ता एसएसपी प्रविण धितालका अनुसार फरार कैदीलाई लुकाउन वा सहयोग गरेको आशंकामा श्रीमानमाथि पनि अनुसन्धान भइरहेको छ ।

सपना तामाङलाई जिल्ला अदालत रसुवाले अपहरण, शरीर बन्धक, कर्तव्य ज्यान तथा डाँकाचोरीसम्बन्धी चारवटा मुद्दामा दोषी ठहर गर्दै जन्मकैदको सजाय सुनाएको थियो ।