सुरुङमार्गको ठेकेदारबाट हर्जना दाबी

नागढुङ्गा–सिस्नेखोला सुरुङमार्ग निर्माण गर्ने ठेकेदार कम्पनीले क्षतिपूर्तिस्वरूप सवा तीन अर्ब रुपियाँको माग दाबी गरेको छ । सम्झौता अनुसारको डिजाइनमा फरक परेकाले बढी काम गर्नुपर्दा, विभिन्न माग राख्दै स्थानीयले गरेका पटक पटक अवरोधले काम रोक्नुपर्दा सयौँ कामदार र उपकरण बेरोजगार बसेको तथा डलरको मूल्य बढेको कारण देखाउँदै निर्माण कम्पनीले सो क्षतिपूर्ति माग गरेको नागढुङ्गा–सिस्नेखोला सुरुङमार्ग निर्माण आयोजनाले जनाएको छ ।

आयोजनाका प्रमुख सौजन्य नेपालले सम्झौता अनुसार सुरुङमार्गको भित्ता खन्ने र त्यसको ‘सपोर्टिङ’ प्रक्रियालगायतको कामको लागतभन्दा बढी र थप काम गर्नु परेको र विभिन्न समयमा भएका अवरोधका कारण जनशक्ति र उपकरणले काम गर्न नपाउँदा क्षति पुगेको भन्दै निर्माण कम्पनीले हर्जनास्वरूप तीन अर्ब २५ करोड रुपियाँको माग दाबी गरेको जानकारी दिनुभयो । त्यसै गरी डलरको भाउ बढ्दासमेत क्षति पुगेको निर्माण कम्पनीको दाबी छ ।