अवसरवादीलाई वहिष्कार गरौं
rajdhanidaily.com · Tue Aug 03 23:16:30 GMT 2021
राजनीतिक अवसरवादी यानेकी ‘राजनीतिक भतुवा’ शब्द सुन्नमै अशिष्ट छ । कसलाई राजनीतिक भतुवा वा अवसरवादी भनिएको हो भन्ने कुराले धेरैलाई आश्चर्य पनि लाग्न सक्ला । उमेर र शारीरिक अवस्था तन्दुरुस्त भए पनि परिश्रम गर्न नचाहने काम गर्नको दुःखले अरूको घरघरमा डुलेर सित्तैमा भात मागी खान पल्किएको लाछी व्यक्ति भतुवा हो भन्ने कुरा नबुझ्ने नेपाली सायदै होलान् । तर, सर्वसाधारणको घरको भातको सट्टामा जनविश्वास र जनमतलाई नै बिक्री गरी खाने राष्ट्रिय बजेट नै खाने, सम्पत्ति आर्जन गर्नकै निम्ति राजनीतिमा लाग्ने तथा नैतिक इमानदारिता र राजनीतिक सिद्धान्तलाई नै बन्धकमा राख्ने अवसरवादी, नकावधारी राजनीतिज्ञलाई यहाँ राजनीतिक भतुवाको संज्ञा दिइएको छ । राजनीतिक भतुवाले राजनीतिलाई सेवा होइन आर्जनको पेसा बनाएको हुन्छ । समाज सेवाको नामबाटै उसले आर्जन गर्छ । जनमतलाई त उसले गैरकानुनी कार्य गर्ने लाइसेन्स ठान्छ । माउपार्टीमा अवसर कम देखिए दल परिवर्तन गरेरै भए पनि अनर्गल फाइदा लिन भतुवा पछि पर्दैन । दल परिवर्तन त भतुवाका निम्ति सबैभन्दा ठूलो अवसर बन्छ । अन्ततः यही प्रवृत्तिमा आशक्त हुँदा ऊ पतन हुँदै जान्छ ।
राजनीतिक भतुवाबारे अझै विस्तृत रूपमा बुझ्न हामीले राजनीतिक नेताहरूकै व्यवहार र कार्यशैलीबारे अध्ययन गर्नुपर्ने हुन्छ । वास्तविक राजनीतिज्ञकै रूपमा परिचित हुन व्यक्तिमा विशेष राजनीतिक खुबी र दक्षता हुनै पर्छ । यसैले राजनीति गर्ने सबै व्यक्ति राजनीतिज्ञ हुँदैनन् । सेवाभावना, अटुट जनविश्वास, नैतिकता, इमानदारिता र सरकारात्मक सोचको कसीमा उत्तीर्ण सिद्धान्तवादी व्यक्ति राजनीतिज्ञका रूपमा चिनिन्छ । जस्तोसुकै विषम परिस्थितिमा पनि राजनीतिज्ञ आफ्नो सिद्धान्तबाट विचलित हुँदैन । तर, यो वर्गमा पर्ने आदर्श राजनीतिज्ञ नेपालमा विरलै मात्र छन् । राजनीतिमा आबद्ध अधिकांश व्यक्ति भने मध्यमार्गी छन् । मध्यमार्गी यस अर्थमा कि उनीहरू राजनीतिक उद्देश्य लिएरै आबद्ध भए पनि अवसरलाई नै सर्वोपरि ठान्छन् यिनीहरूमा राजनीतिज्ञको जस्तो उच्च राजनीतिक इमानदारिता हुँदैन । तथापि आफ्नो दलीय सिद्धान्त र मूल्य मान्यताबाट हम्मेसी यिनीहरू विचलित हुँदैनन् ।
स्रोतमा पूरा पढ्नुहोस् (rajdhanidaily.com)