शिक्षालाई गुणस्तरीय र जीवनोपयोगी बनाउन आग्रह

काठमाडौँ । मुलुकको उच्च शिक्षालाई जीवनोपयोगी र समयसापेक्ष बनाउन शिक्षाविद् तथा शिक्षाकर्मीहरूले जोड दिएका छन् । मुलुकको शैक्षिक संस्थाहरूलाई राजनीतिक तह भन्दा माथि राखेर जीवनोपयोगी र बजारमुखी शैक्षिक संस्थाको रूपमा विकास गर्न शिक्षा क्षेत्रका विज्ञहरूले औँल्याएका हुन् ।

शुक्रवार पशुपति बहुमुखी क्याम्पसको ४४ औ वार्षिकोत्सव कार्यक्रमको अवसरमा आयोजित कार्यक्रममा शिक्षाविद् तथा नीति निर्माताहरुले आजको शिक्षालाई जीवन र प्रविधिसँग जोड्न जोड दिएका हुन् । पूर्व अर्थमन्त्री शङ्कर कोइरालाले उच्च शिक्षालाई प्रतिस्पर्धी र बजारमुखी बनाउनु पर्नेमा जोड दिए । प्रतिनिधि सभाका अर्थ समितिका सभापति सन्तोष चालिसेले युवा विद्यार्थीको पलायन रोक्न मुलुक भित्रै आशा र विश्वास जगाएर युवा शक्तिलाई अर्थतन्त्रको विकासमा लगाउनु पर्ने बिचार व्यक्त गरे ।