अक्सफोर्डको कोरोना भ्याक्सिन  प्रयोगमा रोक लगाउने देशको संख्या बढ्यो

एजेन्सी। अक्सफोर्डको कोरोना भ्याक्सिन ऐस्ट्रेजेनेका (नेपालमा आएको कोभिशिल्ड) लगाएका व्यक्तिमा स्वास्थ्य समस्या देखिन थालेको भन्दै विभिन्न सातवटा देशले भ्याक्सिन प्रयोग गर्न प्रतिबन्ध लगाएका छन् । यस सूचीमा डेनमार्क, नर्वे, इटाली, अस्ट्रिया, आइसल्यान्ड, थाइल्यान्ड, बुल्गेरिया रहेका छन्। यी देशले उक्त भ्याक्सिनमाथि अस्थायी रूपमा रोक लगाएका हुन् ।

युरोपमा अहिलेसम्म ५० लाख व्यक्तिले यो भ्याक्सिन लगाइसकेका छन् । यसमध्ये झण्डै ३० जनामा रक्त नलीमा रगत जम्ने (ब्लड क्लाटिंग) समस्या देखिएको छ । ‘ब्लड क्लाटिंग’ का कारण रक्तनली थुनिने वा रगतको प्रवाहमा अवरोध आउनाले हृदय, मष्तिष्कलगायतका अन्य अंगमा आवश्यक मात्रामा रगत पुग्न पाउँदैन । चिकित्सकहरूका अनुसार यस्तो भएमा मुटु तथा मस्तिष्क घात हुनसक्ने खतरा हुन्छ । अस्ट्रियामा भ्याक्सिन लगाएका एक जनाको ‘ब्लड क्लाटिंग’ हुँदा ‘पल्मोनरी इम्बोलिज्म’ का कारण मृत्यु भएको बताइए पनि भ्याक्सिनका कारण यो समस्या उत्पन्न भएको हो वा होइन भन्ने पुष्टि भइनसकेको समाचार संस्था रोयटर्सले लेखेको छ ।