स्याङ्जामा मतगणना, बाजुरामा अझै अन्योल

स्याङ्जा/बाजुरा : निर्वाचन आयोगले निर्देशन दिएसँगै बुधबार स्याङ्जा २ मा मतगणना सुरु भएको छ। बाजुरामा भने अन्योल नै छ। सर्वदलीय बैठक एमाले प्रतिनिधि उपस्थित नभएपछि बिनानिष्कर्ष टुंगिएको छ।

आयोगले बुधबार दुवै जिल्लामा मतगणना गर्न मुख्य निर्वाचन अधिकृतको कार्यालयलाई निर्देशन दिएको थियो। त्यसपछि स्याङ्जा २ मा मतपेटिका थन्क्याएको एघारौं दिन बुधबार बेलुकी गणना थालिएको हो। मंसिर ४ गते मतपेटिका ल्याएर वालिङ नगरपालिकाको मतगणनास्थलमा राखेपछि धाँधलीको आरोप लगाउँदै एमालेले पुनः मतदानको माग गरेको थियो। एमाले नेता कार्यकर्ता १० औं दिनसम्म प्रदर्शनमा उत्रिएका थिए। कांग्रेस नेता कार्यकर्ता विधिप्रक्रिया पूरा गरी गणनास्थलमा ल्याइसकेको मत गनिनुपर्ने माग गर्दै ९ दिनदेखि आन्दोलनमा थियो। एमालेले चापाकोटका ४ बुथ कांग्रेसले कब्जा गरेको आरोप लगाउँदै उजुरी गरेको थियो।