६८ अर्बको सूचना प्रविधि सेवा निर्यात

नेपालका सूचना प्रविधि कम्पनीहरूले एक वर्षमा ५१ करोड ५४ लाख अमेरिकी डलरबराबरको सेवा निर्यात गरेका छन् । सोमबारको विनिमय दरअनुसार यो करिब ६७ अर्ब ९८ करोड रुपैयाँ हो । सन् २०२२ मा नेपाली कम्पनीहरूको सेवा निर्यात मूल्यमा ६४.२ प्रतिशतले बढेको हो । २०२१ मा यस्तो निर्यात ३१ करोड ३९ लाख डलर (करिब ४१ अर्ब ४० करोड रुपैयाँ) मात्रै थियो ।

इन्स्टिच्युट फर इन्टिग्रेटेड डेभलपमेन्ट स्टडिज (आइआइडिएस)को अध्ययनले यस्तो देखाएको हो । सन् २०२२ मा एक सय ६ वटा सूचना प्रविधि कम्पनीले सेवा प्रवाह गरेका छन् । त्यस्तै, १४ हजार सात सय २८ जनाले स्वतन्त्र ढंगले निर्यात गरेका छन् । स्वतन्त्र ढंगले आइटी सेवा प्रवाह गर्ने ६६ हजार पाँच सय नौजनाले डिजिटल प्लेटफर्मबाट आइटी सेवा निर्यात गरिरहेको अध्ययनले देखाएको छ ।