‘एकीकृत जनक्रान्ति’का नाममा मृत्यु भएका परिवारलाई न राज्यले हेर्यो, न त पार्टीले

२०७६ जेठ १२ गते बेलुका ४ बजेर १३ मिनेटमा मनिषा शाहीले दाजु प्रज्ज्वल शाहीलाई फोन गरिन् । घर कुनबेला फर्कने भनेर दाजुलाई सोध्नासाथ उताबाट जवाफ आयो– एकछिनमा आउँछु ।​ मनिषाले दाजु कतै व्यस्त भएको ठानेर फोन काटिन् । ओछ्यानमा बसेर मोबाइलबाट फेसबुक चलाइरहँदा उनले दाजुको मृत्यु भएको समाचार देखिन् ।

परिवारको पहिलो सन्तान प्रज्वलको निधन भएको तीन वर्ष बित्दा पनि मनिषा र उनको परिवारले त्यो पीडा बिर्सन सकेका छैनन् । ‘बुबालाई असाध्यै पीडा हुन थालेपछि आजभोलि रक्सी खान थाल्नुभएको छ । दाइले छोडेर गएपछि सिङ्गो परिवार असहाय र अभिभावकविहीन छ,’ मनिषा भन्छिन् ।