पहिरोले अवरुद्ध कर्णाली करिडोर एकतर्फी खुल्यो

पहिरोका कारणले अवरुद्ध रहेको कर्णाली करिडोर आज बिहानदेखि एकतर्फी खुलेको छ। मङ्गलबार र बुधबार आएको अविरल वर्षाले सडक अवरुद्ध भएको थियो।

अविरल वर्षाका कारणले कर्णाली करिडोरअन्तर्गतको कालीकोट सडक खण्डको नरहरिनाथ गाउँपालिका–८ खुलालुदेखि बाजुराको सिमाना लैफुसम्म ठाउँठाउँमा लेदोसहितको पहिरो गएर अवरुद्ध बनेको थियो। दुई दिनसम्म बर्सातको कारण कर्णाली करिडोरअन्तर्गत सुर्खेत–हुम्ला सडकखण्डको खुलालुदेखि लैफुसम्म ठाउँठाउँमा पहिरो, लेदो खसेको र पहिरो हटाइ सडक सुचारु गरिएको जिल्ला प्रशासन कार्यालय कालीकोटले जनाएको छ।