वडाध्यक्षहरूले सांसदलाई सोध्न थाले- 'हाम्रो वडाका योजनामा बजेट खै ?'

पोखरा । आफ्ना वडामा परेका योजनाको सुची माग गर्दै कास्की कास्की निर्वाचन क्षेत्र नम्बर ३ बाट निर्वाचित प्रतिनिधि सभा सदस्य बिना गुरुङलाई वडाध्यक्षहरूले औपचारिक पत्र पठाएका छन् । माछापुच्छ्रे गाउँपालिकाको वडा नम्बर ८ र ९ का वडाध्यक्षहरूले औपचारिक पत्र नै लेखेर सङ्घीय बजेटमा परेका योजनाको विवरण माग गरेका हुन् ।

अहिले स्थानीय तहहरू आगामी आर्थिक वर्षको बजेट निर्माणको चरणमा छन् । सङ्घ र प्रदेशबाट कस्ता योजना स्वीकृत भएर आएका छन् भन्ने जानकारी नहुँदा स्थानीय पालिकाका योजना र सङ्घीय योजनामा दोहोरोपना हुन सक्ने जोखिम बढेको भन्दै उनीहरुले पत्र लेखेका हुन् । माछापुच्छ्रे ८ का वडा अध्यक्ष रामबहादुर गुरुङ र ९ का अध्यक्ष हरिबहादुर क्षेत्री (राजेन्द्र)ले पत्र लेखेर सङ्घीय सरकारको आगामी बजेटमा समावेश गरिएका योजनाको सूची उपलब्ध गराउन आग्रह गरेका छन् ।