रास्वपाको राष्ट्रिय महाधिवेशन वैशाख तेस्रो साता गर्ने प्रस्ताव

काठमाडौँ — रवि लामिछाने नेतृत्वको राष्ट्रिय स्वतन्त्र पार्टी (रास्वपा) ले आगामी वैशाख तेस्रो साता पार्टीको महाधिवेशन गर्ने प्रस्ताव गरेको छ ।

शनिबार सम्पन्न पार्टीको बन्द कार्यशालाले पार्टीको महाधिवेशन मितिसमेत तय गर्नेगरी केन्द्रीय समितिलाई उक्त सुझाव दिएको हो । त्यसैगरी बैठकले पार्टीको राष्ट्रिय भेला आगामी असोज ३ र ४ गते आयोजना गर्ने निर्णय पनि गरेको छ । ‘राष्ट्रिय भेला २०८१ असोज ३ र ४ गते आयोजना गर्ने । राष्ट्रिय महाधिवेशन मिति २०८२ वैशाख तेस्रो सातामा गर्ने । विधान संशोधन सुझाव कार्यदलको प्रतिवेदन भदौ मसान्तभित्र तयार गरी केन्द्रीय समितिमार्फत राष्ट्रिय भेलामा पेस गर्ने । जिल्ला संयोजक तथा उपसंयोजक र निर्वाचन क्षेत्र समितिको संलग्नतामा जिल्ला भेलामार्फत जिल्ला तदर्थ समिति गठन गर्ने निर्णय भएको छ,' कार्यवहाक महामन्त्री बुर्लाकोटीले भने ।