शालीन नेताको अवसान

नेपाली राजनीतिले एक कुशल राजनीतिज्ञ गुमाएको छ । लामो समयदेखि सक्रिय राजनीतिमा रहनुभएका सांसद सुवास नेम्वाङको अप्रत्यासित निधनपछि एक शालीन नेता देशले गुमाएको भन्दै समवेदना प्रकट गर्नेहरुको संख्या पनि बढ्दो छ । नेपाली राजनीतिमा आएका अधिकांश नेताहरु केही न केही विवादमा तानिदै आए पनि स्व. नेम्वाङ भने विवादमा तानिनुभएन । उहाँले लय बिराउन खोजेको राजनीतिलाई लयमा ल्याउन अहं भूमिका निर्वाह गर्नुभएको थियो । लामो समयदेखिको नेपाली जनताको चाहना पूरा गर्ने क्रममा संविधानसभाबाट संविधान जारी गर्न नेम्वाङले खेल्नुभएको भूमिकालाई राष्ट्रिय तथा अन्तर्राष्ट्रिय समुदायले समेत प्रशंसा गरेको थियो । झन्डै ५० वर्षदेखि सक्रिय राजनीतिमा रहँदै आउनुभएका नेम्वाङलाई सबै पार्टीले शालीन नेताको उपाधिसमेत दिएका थिए ।

नेपाललाई जातीय राज्यमा लैजाने कोशिश भएको बेलामा समेत त्यसले नेपाललाई गम्भीर दुर्घटनामा लैजान सक्ने भन्दै नेम्वाङले जातीय राजनीतिविरुद्ध जेहाद नै छेड्नुभएको थियो । नेपालको संसदीय राजनीतिमा लामो समयसम्म आफ्नो प्रभाव छोड्न सफल नेता नेम्वाङलाई सबै राजनीतिज्ञले असल नेताको रुपमा चिन्ने गरेका थिए । कसैलाई पनि व्यक्तिगतरुपमा अपमान गर्ने बानी नभएका नेम्वाङले २०७२ सालमा संविधान जारी गर्न खेल्नुभएको भूमिकालाई सबै राजनीतिक दलले उहाँप्रति दर्शाएको सम्मानले उहाँ कत्तिको सम्मानित नेता हुनुहुन्थ्यो भन्ने छर्लंग हुन्छ । नेता भएपछि नैतिकता हराउने गरेको आरोप लाग्ने गरेको भए पनि स्व. नेम्वाङले भने यस्तो आरोपको कहिल्यै सामना गर्नुपरेन ।