फेरि मेसीमै नजर

दोहा — मारियो केम्पसको प्रेरणदायी प्रदर्शनमा अर्जेन्टिना सन् १९७८ को फाइनलमा नेदरल्यान्ड्सलाई हराएर पहिलोपल्ट विश्वकप फुटबलमा च्याम्पियन भएको थियो । त्यसको दुई दशकपछि डेनिस वर्गक्याम्पको उत्कृष्ट गोलमा अर्जेन्टिनालाई हराएर नेदरल्यान्ड्स सेमिफाइनल पुगेको थियो । गोलकिपर सर्जियो रोमेरो पेनाल्टी सुटआउटमा हिरो भएपछि २०१४ मा अर्जेन्टिनाले डच टिमको चुनौती पन्छाउँदै फाइनलमा स्थान बनाएको थियो ।

त्यसैले नेदरल्यान्ड्स र अर्जेन्टिनाबीचको फुटबल मैदानमा प्रतिस्पर्धाको इतिहास लामो छ र निकै रोचक पनि । यी दुईबीच सधैं रोमाञ्चक खेलको हुने गर्छ । यी दुई टिम शुक्रबार लुसेल रंगशालामा भिड्दै छन् । यसमा पनि सुन्दर र आक्रामक खेलको अपेक्षा गरिएको छ ।