राखेपमा प्राविधिक कर्मचारीको अभाव

काठमाडौँ । राष्ट्रिय खेलकुद परिषद् (राखेप) मा प्राविधिक कर्मचारीको चरम अभाव देखिएको छ । प्राविधिक कर्मचारी नहुँदा त्यसले खेलकुद गतिविधिसँगै भौतिक पूर्वाधार निर्माणमा समेत बाधा पुगेको देखिन्छ ।

अर्थ मन्त्रालयले परिषद्लाई एक हजार कर्मचारीको दरबन्दीभित्र रहेर काम गर्न सैद्धान्तिक सहमति दिएको वर्षौँ बित्दा पनि दरबन्दी पूर्ति हुन सकेको छैन । अहिले परिषद्मा प्रशासनतर्फ एक सय ४४ जना र प्रशिक्षणतर्फ तीन सय १७ जना गरी चार सय ६१ जना स्थायी कर्मचारी छन् । त्यस्तै प्रशिक्षण र प्रशासनतर्फ तीन सय ४५ जना करारका कर्मचारी छन् । सुरक्षागार्ड, चालक लगायत सबै गरी कुल सात सय ७७ जना कर्मचारी परिषद्मा कार्यरत रहेको जानकारी परिषद्को कर्मचारी प्रशासन शाखा प्रमुख अनन्ता देवी खनालले दिइन् । खनालका अनुसार गत महिनामात्रै ३९ जनाले अवकाश पाएका थिए ।