हेलिकोप्टर उडान भक्तपुरको नलिञ्चोकबाट

काठमाडौँ — त्रिभुवन अन्तर्राष्ट्रिय विमानस्थलको हवाई चापलाई घटाउन नागरिक उड्डयन प्राधिकरणले हेलिकोप्टर उडानलाई भक्तपुरको नलिञ्चोक सार्ने निर्णय गरेको छ । प्राधिकरणका महानिर्देशक प्रदीप अधिकारीका अनुसार भक्तपुरको नलिञ्चोकस्थित प्राधिकरणको स्वामित्वमा रहेको ३२ रोपनी जग्गामा हेलिप्याड सार्ने निर्णय भएको हो ।

‘काठमाडौं विमानस्थलको ट्राफिक चाप घटाउन हेलिकोप्टर सेवालाई भक्तपुर सार्दै छौं,’ आइतबार गौचरमा सुरु गरिएको नयाँ आन्तरिक टर्मिनल उद्घाटन कार्यक्रममा महानिर्देशक अधिकारीले भने, ‘हेलिप्याड भक्तपुरमा सारिएपछि आन्तरिक र अन्तर्राष्ट्रियतर्फका व्यावसायिक उडानले ग्राउन्ड या आकाशमा होल्ड हुनुपर्ने समस्यामा क्रमिक सुधारिँदै जानेछ ।’ हेलिकोप्टर उडानलाई नलिञ्चोक स्थानान्तरण गरिए पनि बिरामी बोकेका चार्टर्ड उडानले भने विमानस्थल प्रयोग गर्न पाउनेछन् । ‘अत्यावश्यक पर्दा बिरामी ल्याउनुपर्ने भएमा त्यस्ता चार्टर उडानलाई त्रिभुवन अन्तर्राष्ट्रिय विमानस्थलमा प्राथमिकताका आधारमा उडान अवतरण गर्न दिइनेछ,’ उनले भने । मनोरञ्जनात्मक चार्टर उडान भने नलिञ्चोकबाटै हुनेछ ।