आफैँ पात्र आफैँ कथा

आफैँ कथा भइयो । कथाको अभाव थियो । घरबाट निस्कँदा दुई पेग लगाइएछ । राम्रो कुरा त होइन दारु खाएको कथा लेख्नु । कथा मात्र लेख्नु कहाँ हो र, साथमा छोरी पनि थिई । उसैको किनमेलका लागि नयाँ सडकतिर लाग्नु थियो ।

बस आउँथ्यो कीर्तिपुरबाट । छोरीले थाहा पाएकी थिई मैले सुटुक्क दुई पेग लगाएको । पेगको नाप पनि एक्युरेट थिएन । बढी हालिएजस्तो थियो गिलासमा । स्टिलको गिलासमा लुकाएर खाएको थिएँ हतारमा, बुढीले देखी भने कोठामा थुन्ने थिई ।